Pas dhjetë ditë fushatë publike dhe shumë ditë terja fushatë të pa shpallur, në këto çaste ka filluar heshtja zgjedhore për zgjedhjet e jashtëzakonshme parlamentare të Kosovës.

Sipas ligjeve të Republikës së Kosovës, heshtja zgjedhore fillon një ditë para mbajtjes së zgjedhjeve dhe heshtja hynë në fuqi në ora 24:00. Në heshtjen zgjedhore ndalohet çdo organizim apo thirrje publike, për çdo subjekt politik dhe kandidat politik, po ashtu janë të ndaluara edhe të gjitha llojet e marketingut zgjedhor.

Në garën për të hyrë në Kuvendin e Kosovës janë dy koalicione të mëdha PDK-AAK-Nisma dhe disa parti të vogla, koalicioni LDK-AKR-Alternativa, kurse Lëvizja Vetëvendosje garon e vetme. E vetme ka vendosur të garojë edhe Partia Fjala.
Në garë janë edhe disa parti të komuniteteve joshqiptare. Votimet fillojnë të dielën në ora 07:00 dhe vendvotimet mbyllen në ora 19:00.

Kuvendi i Kosovës ka 120 deputetë dhe për ta formuar qeverinë, një parti apo koalicion qeverisës, duhet ta ketë së paku shumicën e thjeshtë parlamentare.

Më shumë se 1.7 milion qytetarë me të drejtë vote do të vendosin për përbërjen e re të Kuvendit të Kosovës. Ata kanë mundësinë që t’i votojnë kandidatët për deputetë pa afera korruptive duke mos ua dhënë mundësinë politike edhe një herë atyre që e kanë shkatërruar të ardhmen e Kosovës.
Komisioni Qendror i Zgjedhjeve ka bërë të gjitha përgatitjet për mbajtjen e zgjedhjeve të parakohshme parlamentare, të cilat do të mbahen të dielën më 11 qershor. Kështu ka njoftuar KQZ-ja, e cila ka bërë të ditur se ka certifikuar rreth 30 mijë vëzhgues dhe ka bërë gati të gjitha materialet e nevojshme.
Nga ana tjetër, edhe Policia e Kosovës ka njoftuar për “Zërin” se tashmë ka hartuar planin operativ, ku një numër i konsiderueshëm i pjesëtarëve të PK-së pritet të angazhohen këtë të diele.

Ndërkohë edhe përfaqësuesit e rrjetit të organizatave Demokracia në Veprim, kanë thënë se pavarësisht afatit të shkurtër kanë arritur t’i kryejnë të gjitha përgatitjet operuese për vëzhgimin e procesit zgjedhor.

Me këtë rast, DnV-ja ka njoftuar se do t’i mbulojë të gjitha qendrat dhe vendvotimet, duke përfshirë edhe vendvotimet në komunat veriore, por edhe komunat tjera me shumicë serbe. Ndërkaq në veri pritet të jetë i pranishëm edhe misioni i OSBE-së, mirëpo jo për t’i monitoruar zgjedhjet, por për të ofruar mbështetje teknike.